Trátase dun servizo gratuíto de fotos en 3D que estará na expo ‘Quino na música’ durante toda esta semana

Experiencia cuasi inmersiva. A exposición ‘Quino na música’ acolle un ‘Photocall 3D’ que é a primeira vez que se pode ver nunha grande exposición de cómic en España. As e os visitantes que se acheguen a esta mostra poderán sacar fotos 3D con Mafalda e Astro Ratón, a personaxe creada polo ilustrador Fermín Solís, grazas ao escáner de última xeración ScanMeNow.

Este aparello conta con 120 cámaras e reproduce fotos tridimensionais que os asistentes poden descargar a través dun código QR. É un aporte de Turismo da Coruña ao festival Viñetas desde o Atlántico dentro da súa estratexia de sostebinilidade. “É a primeira vez que esta tecnoloxía se utiliza nunha gran exposición do cómic en España”, destacou Manel Cráneo.

ScanMeNow é un sistema de fotografía inmersivo composto por máis dun cento de cámaras que se conectan aos correspondentes microprocesadores para sacar unha foto en 360º dunha persoa que se introduce dentro do módulo do trebello 3D. Esta imaxe logo se procesa a través de intelixencia artificial para dar lugar a unha fotografía en 3D. “A idea
é poder levar unha lembranza virtual dun mesmo”, apunta Manuel Meijide, o responsable
de ScanMeNow.

Para iso, as persoas que decidan facerse a foto recibirán un código QR a través do que terán que meter os seus datos –nome e corres electrónicos-- e, unhas horas despois, recibirán por e-mail a súa imaxe en 3D. Este innovador sistema de realidade aumentada estará durante toda esta semana no Palexco, á entrada da exposición ‘Quino na música’.

QUINO E MAFALDA

O ScanMeNow atópasa á entrada da exposición ‘Quino na música’, unha homenaxe sen precedentes á obra do debuxante arxentino Joaquín Salvador Lavado Tejón, Quino (1932–2020), centrada na súa relación fonda e constante coa música. A mostra, aberta ao público dende xuño na sala de exposicións do Palexco, poderá visitarse ata o 21 de
setembro.

Con máis dun cento de debuxos orixinais, entre eles tiras publicadas dende os anos cincuenta ata finais dos noventa, ‘Quino na música’ amosa como a música —do tango ao rock, da música clásica ao pop— está presente en toda a traxectoria do autor. Dende o amor de Mafalda polos Beatles ata a crítica á censura ou aos poderes establecidos a través da música, a exposición permite redescubrir a riqueza expresiva, estética e ideolóxica dunha das voces máis singulares do humor gráfico contemporáneo.

PROGRAMACIÓN DE MAÑÁ, XOVES

O Festival Internacional da Banda Deseñada Viñetas desde o Atlántico afronta este xoves 14 de agosto unha nova xornada cargada de actividades para todos os públicos.

Pola mañá, a Rúa da Banda Deseñada acollerá ás 11:00 horas a charla Pedro Pico & Pico Vena. Historias del punk, con Carlos Azagra e Encarna Revuelta. Ás 12:00 horas, o mesmo espazo será escenario da charla Ética, respecto e compromiso na edición de cómics, a cargo de Emilio e Iris Bernárdez; á mesma hora, na Biblioteca Municipal de Estudos Locais, Adrián Prado impartirá un obradoiro de deseño e debuxo de personaxes con análise de portafolios profesionais (inscrición previa). Tamén ás 12:00 e ás 13:00 horas, a Sala Palexco acollerá dous obradoiros infantís Con permiso de Quino. Aprende a debuxar a Mafalda, dirixidos a nenos e nenas de 7 a 9 e de 10 a 11 anos, respectivamente, con Alberto Díaz. A mañá completarase ás 13:00 horas na Rúa da Banda Deseñada coa charla Cómic & Rock en Malasaña, con Clara e Olivia Cábez e Miguel B. Núñez.

Xa pola tarde, ás 17:00 horas, haberá un novo obradoiro Con permiso de Quino para público a partir de 12 anos na Sala Palexco, mentres que na Rúa da Banda Deseñada terá lugar unha sesión de sinaturas con Dave Cooper, Magius, Clara e Olivia Cábez, Miguel B. Núñez, Víctor Coyote, Carlos Azagra e Encarna Revuelta. Ás 18:30 horas presentarase A mansión misteriosa, de Marcos B., e ás 19:30 horas, Muérdete la lengua, por (en inglés e sen intérprete). O Teatro Colón acollerá ás 21:00 horas o concerto ilustrado coa banda Hombre Tigre e as autoras Anabel Colazo e Raquel Montero. A xornada rematará ás 23:30 horas na Sala Mardi Gras co Cols DJ Set, a cargo de Clara e Olivia Cábez.

A Coruña acolle a primeira exposición peninsular sobre Quino e a música da man de Viñetas desde o Atlántico

Mafalda xa é parte da Coruña, e de Galicia. A mítica personaxe de Quino pasará a formar parte do elenco das míticas figuras que ano tras ano invaden a cidade coruñesa durante a celebración do Viñetas desde o Atlántico. Precisamente, este martes, a alcaldesa Inés Rey, xunto co director do festival, Manel Cráneo, inauguraron esta nova figura no marco dunha visita á exposición ‘Quino na música’, unha homenaxe sen precedentes á obra do debuxante arxentino Joaquín Salvador Lavado Tejón, Quino (1932–2020), centrada na súa relación fonda e constante coa música. A mostra, aberta ao público dende xuño na sala de exposicións do Palexco, poderá visitarse ata o 21 de setembro.

Con máis dun cento de debuxos orixinais, entre eles tiras publicadas dende os anos cincuenta ata finais dos noventa, ‘Quino na música’ amosa como a música —do tango ao rock, da música clásica ao pop— está presente en toda a traxectoria do autor. Dende o amor de Mafalda polos Beatles ata a crítica á censura ou aos poderes establecidos a través da música, a exposición permite redescubrir a riqueza expresiva, estética e ideolóxica dunha das voces máis singulares do humor gráfico contemporáneo.

Tecnoloxía 3D

As e os visitantes que se acheguen a esta mostra tamén poderán sacarse fotos 3D coas personaxes de Mafalda e Astro Ratón grazas ao escáner de última xeración ScanMeNow. Este aparato conta con 120 cámaras e reproduce fotos tridimensionais que os asistentes poden descargar a través dun código QR. É un aporte de Turismo da Coruña ao festival Viñetas desde o Atlántico dentro da súa estratexia de sostebinilidade e a primera vez que se pode gozar del nunha gran exposición na Coruña. “É a primeira vez que esta tecnoloxía se utiliza nunha gran exposición do cómic en España”, destacou Manel Cráneo.

Un percorrido temático e emocional

A exposición ‘Quino na música’ divídese en varias seccións temáticas que permiten trazar un percorrido coherente e envolvente pola obra do autor:

O humor e a musicalidade dos seus personaxes, como Mafalda ou Guille, que expresan as súas ideas a través da música ou revelan gustos musicais que reflicten tensións sociais
e xeracionais.

Referencias musicais nas súas obras: A través de partituras, instrumentos e letras de cancións, Quino constrúe situacións que dialogan co contexto cultural da Arxentina e do mundo.

Música e política: A exposición salienta tamén as viñetas nas que a música se utiliza como vehículo de crítica, resistencia ou conciencia social.

Colaboracións artísticas: Inclúese tamén unha selección de materiais audiovisuais e documentos que ilustran as colaboracións de Quino con músicos e artistas ao longo da súa carreira.

Entre as pezas máis destacadas atópanse páxinas orixinais nas que Mafalda interroga o mundo mentres escoita discos de vinilo, sátiras visuais sobre concertos ou educación musical, ou debuxos nos que os pentagramas e os instrumentos se converten en
ferramentas narrativas e simbólicas.

Un dos pratos fortes do Viñetas 2025

A chegada de Quino na música a Galicia supón un dos actos centrais da edición 2025 do Viñetas desde o Atlántico, que celebra estes días a súa semana grande. A exposición reforza o compromiso do festival co recoñecemento internacional da banda deseñada
como arte maior e coa promoción de autorías que marcaron xeracións de lectores e lectoras en todo o mundo.

Do 11 ao 17 de agosto de 2025, a cidade da Coruña acolle a celebración da 28ª edición do Festival Viñetas desde o Atlántico con máis autores, exposicións e novidades ca nunca

“É a exposición máis ambiciosa desde o comezo deste festival”. A alcaldesa da Coruña, Inés Rey, destacou a importancia que esta 28ª edición do Festival Viñetas desde o Atlántico ten para a cidade e para toda Galicia. E é que a cidade converterase desde esta semana na capital peninsular da banda deseñada con numerosas exposicións, obradoiros, visitas guiadas ou concertos, entre outras moitas actividades.

Este Viñetas amosará 1.400 pezas entre obra en papel e creación dixital repartidas en 21 exposicións. Haberá sinaturas e actividades de 70 autores e autoras, tres concertos de creadores de banda deseñada que tamén son músicos, un Late Night Show no Colón e seis obradoiros infantís na Sala Palexco.

“Son preto de 60 actividades entre charlas, tertulias, obradoiros ou presentacións e 36 stands de librarías e editoriais”, destacou Inés Rey. Pola súa banda, o director do festival, Manel Cráneo, subliñou, ademais, que A Coruña acollerá catro exposicións internacionais con obras de Canadá, Arxentina, Portugal e Francia. “Estamos ante un dos mellores festivais do mundo”, sinalou.

De feito, tanto o director xeral de Cultura, Anxo Lorenzo, como o presidente da Deputación da Coruña, Valentín González Formoso, destacaron a importancia deste evento. “É un proxecto non só coruñés, senón de toda Galicia”, dixo Lorenzo. “É unha expresión de arte que esperta interese tanto nos máis pequenos coma nos que xa teñen canas e por iso temos que internacionalizalo entre todos”, apuntou Valentín González. Pola súa parte, o director de Márketing de Hijos de Rivera, Antonio Viejo, dixo que esta empresa está para “apoiar a cultura” de Galicia.

FOTOS EN 3D

Este Viñetas tamén destacará polo Scanmenow instalado na exposición de Mafalda, que realiza fotos e reproducións en 3D de todas as persoas que se acheguen á mostra, con figuras de Mafalda e Astro-Ratón e o cartel oficial do festival de fondo. Ademais, hai 11 restaurantes que dedicarán un prato a personaxes e series de banda deseñada, e un libro con cómics exclusivos das persoas convidadas e artigos de investigación.

O tema central desta edición será a relación entre a banda deseñada e o mundo musical, con exposicións e concertos que unen ambas disciplinas. Ademais, Viñetas realizará unha homenaxe a Castelao para conmemorar o 75º aniversario do seu falecemento, e dedicaranse exposicións e actividades especiais para lembrar o seu legado. Nesta edición participan máis de 70 creadores (73), fronte aos 40 do ano pasado, e preséntanse 20 exposicións, en comparación coas 18 de 2024.

E, como non podía ser menos, na Coruña estarán figuras internacionais e estatais da talla de Dave Cooper, un dos principais ilustradores de Canadá; Magius, Premio Nacional de Cómic en 202; Fermín Solís, da nova ola do cómic español; ou o polifacético artista galego Víctor Coyote. Tamén estarán os destacados ilustradores Carlos Azagra, Encarna Revuelta, Miguel B. Núñez, Olivia e Clara Cábez, Don Rogelio J, Inacio e Iván Suárez, Sara Jotabé, Montse Mazorriaga, Marika Vila, Jorge Esteban Urabayen, Sandra Lordi, Laura Suárez, Raquel Gu, Natalia Velarde, Arkaitz González, Diego Burdío e Adrián Prado, entre outros.

EXPOSICIÓN, COMIC E MÚSICA

Ademais, a cidade coruñesa acollerá 20 mostras, incluíndo Quino na Música, Astro-Ratón e Bombillita de Fermín Solís na Sala Municipal de Palexco; Viñetas e Decibelios, no Kiosco Alfonso; e obras de Víctor Coyote, Azagra, Revuelta, Magius, Miguel B. Núñez, Cols (Olivia e Clara Cábez), Don Rogelio J e Wobbly de Dave Cooper, na Casa Museo Picasso. Pola súa parte, en colaboración coa Deputación da Coruña, a Sala Municipal de María Pita acollerá obras de Inacio e Iván Suárez e das gañadoras dos Premios Castelao 2024, Sandra Lordi e Laura Suárez.

Este Viñetas 2025 tamén vén cargado de concertos gráficos e actuacións en vivo, incluíndo o concerto ilustrado de Hombre Tigre, actuacións de autoras como Anabel Colazo e Raquel Montero, ademais da proxección do documental Quinografía e un Late Night Show con entrevistas a autores, presentado por Neves Rodríguez.

OBRADOIROS E ESPECTÁCULOS

Ademais, o Viñetas Mini traerá obradoiros diarios con autores convidados na Sala Municipal de Palexco e espectáculos nas Bibliotecas Municipais, e a tradicional Rúa BD encherá a feira da banda deseñada coa presenza de 35 editoriais e librarías especializadas, con máis de 100 actividades, entre elas sinaturas, charlas, presentacións, visitas guiadas e masterclasses nos Xardíns de Méndez Núñez. Por suposto, tampouco faltarán os obradoiros e revisión de portafolios por parte de editores na sección Viñetas Pro.

Presentacións, contacontos ilustrados, visitas guiadas, obradoiros especializados e o espectáculo Viñetas Late Night protagonizan a programación do 13 de agosto en A Coruña

O Festival Internacional da Banda Deseñada Viñetas desde o Atlántico continúa este mércores 13 de agosto cunha intensa programación que encherá a cidade de actividades para todos os públicos, desde presentacións de novidades editoriais e obradoiros profesionais ata espectáculos de música e cine vinculados ao cómic.

A xornada abrirase ás 11:00 horas coa presentación de Historias do páramo, a cargo de Alexandre Senande e Pjota, na Rúa da BD, en colaboración con Komic Librería. Á mesma hora, na Biblioteca Municipal de Estudos Locais, celebrarase o obradoiro «Espada y pluma: creación dun cómic histórico», impartido por Jorge Esteban Urabayen (inscrición previa na web de Bibliotecas).

Ás 12:00 horas, o público poderá asistir á presentación de Sentinelas da lúa carmesí e Sentinelas no limiar das tebras, con Andrés Castro, Ozo Perozo e Alexandre Senande (tamén en colaboración con Komic Librería), así como á sesión infantil «O contacómic» con Pablísimo na Biblioteca Municipal Castrillón (inscrición previa). Tamén ás 12:00 terá lugar unha visita guiada á exposición dos XIX Premios Castelao, con Sandra Lodi e Laura Suárez, na Sala Salvador de Madariaga.

Pola tarde, ás 17:00 horas, haberá sesión de sinaturas na Rúa da Banda Deseñada con Dave Cooper, Don Rogelio J e Magius. Ás 18:00 horas, o espectáculo infantil «O contacómic» con Pablísimo chegará á Biblioteca Municipal Os Rosales (inscrición
previa).

O Teatro Colón acollerá ás 19:00 horas a proxección de Quinografía, dentro de Viñetas Show. Media hora máis tarde, ás 19:30 horas, o público infantil poderá gozar dun novo Contacómic con Juan Rodríguez na Carpa RúaBD (a partir de 3 anos, en colaboración con Galgo Azul).

A xornada pecharase no Teatro Colón, ás 21:00 horas, cunha nova entrega do Viñetas Late Night «Música & BD», que reunirá a Magius, Fermín Solís e Don Rogelio J nun espectáculo que mestura historieta e música en directo.

O Festival Internacional da Banda Deseñada Viñetas desde o Atlántico arrinca hoxe, luns 11 de agosto, coa inauguración oficial ás 18:00 horas no Kiosko Alfonso.

A xornada de apertura pechará cun concerto gráfico de Don Rogelio J, ás 21:00 horas na Carpa Rúa BD.

Mañá, martes 12 de agosto, o festival continuará cunha intensa programación que combinará charlas, presentacións, obradoiros, visitas guiadas e sinaturas, repartidas entre diferentes espazos da cidade.

Programación para o martes 12 de agosto

MAÑÁ

Na Carpa Rúa BD:

11:00 h – Charla «Con voz propia: historias del yo». Situación das mulleres no sector da BD con Marika Vila, Montse Mazorriaga e Sara Jotabé. (En colaboración coa Sectorial del Cómic)

12:00 h – Presentación de A tese de Margot, por Alba Ceide e Óscar Losada. (En colaboración con Komic Librería)

No Palacio Municipal María Pita:

12:00 h – Visita guiada á exposición Castelao en BD, por Inacio e Iván Suárez.

Na Sala Palexco

12:00 h – Obradoiro de iniciación ao fanzine (Viñetas Mini). A partir de 6 anos. (En colaboración con Autobán. Inscrición no stand 19)

TARDE

Carpa Rúa BD

17:00 h – Sesión de sinaturas: Marika Vila, Montse Mazorriaga, Sara Jotabé, Don Rogelio J, Inacio e Iván Suárez.

18:30 h – Charla «A internacionalización do cómic español, pola Sectorial del Cómic. O proxecto WILDCAT de ENCRE», con Alejandro V. Casasola Medina (presidente) e Emilio Gonzalo Mallo (secretario). (En colaboración coa Sectorial del Cómic)

19:30 h – Charla «Crowdfunding aplicado á autoedición», por Jordi Bayarri. (En colaboración con Anillo de Sirio)

20:30 h – Presentación do proxecto Tebeos a Una, por Pedro Medina. (En colaboración con Fandogamia Editorial)

Sala Palexco

18:00 h – Obradoiro de cómic «Elixe (ou non) a túa propia aventura», por Diego Burdío (8 a 16 anos). (En colaboración con GP Ediciones. Inscrición no stand 5)

Viñetas desde o Atlántico continúa así a súa aposta por ofrecer ao público unha programación diversa que combina creación, formación e encontro entre autores e lectores, consolidando o festival como unha cita de referencia no mundo da banda deseñada.

Estás interesado/a en formar parte do mundo Viñetas desde o Atlántico?. Tes traballos que queiras partillar ou dar a coñecer?. A organización do festival vén de abrir a convocatoria para participar na revisión de portafolios de Viñetas Pro, unha actividade profesional dentro do Festival Viñetas desde o Atlántico 2025.

Se tes interese, non dubides en mandar o teu traballo, e se coñeces a alguén que poida estalo, faillo saber.Tes de data límite de inscrición ata o 28 de xullo ás 23:59h. A data da revisión de portafolios será o venres 15 de agosto ás 10:00h no Circo de Artesáns (Rúa Santo André, 36 – A Coruña).

Para inscribirte preme aquí:

https://vinetasdesdeoatlantico.com/inscricion-a-revision-de-portafolios

Para calquera dúbida, estamos á túa disposición no correo: coordinacion@vinetasdesdeoatlantico.com

Guillermo e Diego Lavado comparten recordos familiares e detalles inéditos da obra e personalidade do creador de Mafalda na mostra ‘Quino na música’, aberta en Palexco ata o 21 de setembro

A Coruña, 01/07/2025 – «Era un tío internacional que volvía de Europa cargado de mundo». Así era o debuxante Joaquín Salvador Lavado Tejón —Quino—, autor da universal Mafalda. Precisamente, na exposición Quino na música, que se pode visitar estas semanas en Palexco (A Coruña) como parte do festival Viñetas desde o Atlántico, a mirada íntima de dous sobriños do artista, Guillermo e Diego Lavado, engádelle unha nova capa de lectura á obra do xenio do humor gráfico. Ademais de seren comisarios da exposición e depositarios da súa memoria familiar, os irmáns Lavado relatan nesta entrevista a dimensión máis humana, próxima e afectiva do seu tío.

«Foi moi próximo para todos nós. Non tivo fillos, así que dalgún xeito ocupamos ese lugar», recorda Guillermo. «Era un home moi observador, tanto cos nenos como cos detalles do mundo que o rodeaba», engade. Esa capacidade de observación, que lle servía para construír situacións cheas de humor, ironía ou crítica social, víase tamén nas relacións familiares: «Tiñamos con el unha relación que cambiaba co tempo, desde unha infancia sensorial ata unha adolescencia chea de cine, música e conversas profundas».

Diego subliña que Quino era tamén unha ponte cara ao exterior: «Nós viviamos nunha vila de Mendoza, e el traía os discos dos Beatles, dos Rolling Stones, noticias, cultura... Era un tío internacional que volvía de Europa cargado de mundo».

A cea co obreiro

Un dos momentos máis emotivos do testemuño é o recordo da súa reacción tras recibir o Premio Príncipe de Asturias en 2014: «Despois de rexeitar varias invitacións, decidiu ir cear cun obreiro que lle reformara o seu piso de Madrid anos antes. Fíxolle un debuxo e dedicoullo. Ese era el: humano, agradecido, sinxelo».

Na exposición, Diego tamén lembra a importancia da obra manual do artista: «Todo o que se ve colgado é da súa man. Non usaba ordenador, cada trazo é seu, feito cunha plumiña. Iso, hoxe, emociona». Entre os obxectos que gardan como verdadeiros tesouros están os seus lentes, os seus lapis e as súas ferramentas de debuxo.

Sobre os personaxes de Mafalda, Guillermo asegura que «todos teñen un 90 % de Quino», desde Felipe e Manolito ata Susanita. Guille, o máis novo da tira, está inspirado no propio Guillermo Lavado, o sobriño, pero el recoñece que nunca falaron diso directamente por «pudor familiar».

Finalmente, reflexionan sobre o papel da música na obra do seu tío: «Para Quino e para Alicia —a súa esposa—, a música foi central. Eran melómanos. Hai viñetas con referencias técnicas á música de cámara, á dirección orquestral, aos conflitos do intérprete. Todo iso faino cun coñecemento e unha sensibilidade que parecen os dun músico profesional», sinala Diego.

A mostra Quino na música pode visitarse en Palexco (A Coruña) ata o 21 de setembro, como parte da programación do festival Viñetas desde o Atlántico 2025. Comisariada por Judith Gociol e Guillermo Lavado, e producida inicialmente polo festival Còmic Nostrum de Palma de Mallorca, esta é a primeira vez que se presenta na Península, da man de Viñetas desde o Atlántico.

O festival de banda deseñada Viñetas desde o Atlántico 2025 celebrarase do 11 ao 17 de agosto, durante as Festas de María Pita. O Goberno de Inés Rey traballa xa na confección dos diferentes eventos deste certame, que ano tras ano atrae á cidade ás mellores editoriais e autores do mundo do cómic.

"O novo impulso dado pola nosa alcaldesa a este evento nos posiciona como o epicentro da banda deseñada durante o mes de agosto, unha mostra máis do liderado da Coruña a nivel cultural", indicou Gonzalo Castro, concelleiro de Cultura e Turismo.

Viñetas desde o Atlántico está organizado polo Concello da Coruña e conta co autor e editor Manel Cráneo como director. O certame estará presente na vindeira edición do Salón Internacional do Cómic de Barcelona, que se celebrará os días 4, 5 e 6 de abril. Alí presentarase o cartel desta edición, que estará deseñado por un autor tamén será desvelado nesas datas.

Este ano, para conmemorar o 75 aniversario do seu falecemento, Alfonso Daniel Rodríguez Castelao será unha das figuras centrais desta edición, incluíndo a súa presenza no cartel. "A figura de Castelao transcende en moitos sentidos a literatura e a política galega, deixándonos unha forte impronta cos seus debuxos e gravados, que recuperaremos esta edición cunha programación especial coma homenaxe", indicou Gonzalo Castro.