Logo Viñetas desde o Atlántico negro horizontal

O cinema de animación fai a sua aparición en Viñetas 2023 con Alberto Vázquez e co ciclo Órbita animada

10 de Xullo de 2024
Coa mostra ‘Alberto Vázquez: do cómic á animación’, a Sala de Exposicións de PALEXCO propón unha oportunidade única para mergullarse no traballo do ilustrador e animador coruñés, autor, entre outros traballos, das premiadas longametraxes ‘Psiconautas’ e ‘Unicorn Wars’ Paralelamente, este venres, 11 de agosto, dentro do ciclo Órbita animada, o Teatro Colón acollerá as proxeccións dos filmes xaponeses ‘The First Slam Dunk’, o esperado e apaixonante relato sobre o mundo do básquet en clave anime do director Takehiko Inoue (12.00h), e a película de culto ‘Akira 4K’ (17.00h), reeditada no ano do seu 35 aniversario

Este venres, 10 de agosto, na súa quinta xornada, Viñetas desde o Atlántico 2023 aposta polo cinema de animación cunha dobre sesión do seu ciclo para público infantil, adolescente e adulto Órbita animada. O Teatro Colón acollerá as proxeccións dos filmes xaponeses The First Slam Dunk, o esperado e apaixonante relato sobre o mundo do básquet en clave anime do director Takehiko Inoue (12.00h), que ven de gañar o Premio Satoshi Kon da excelencia na animación, e a película de culto Akira 4K (17.00h), reeditada no ano do seu 35 aniversario. Ambos pases son de acceso libre ata completar a capacidade da sala.

Por outra banda, Viñetas desde o Atlántico ofrece unha oportunidade única para mergullarse no universo artístico do multipremiado creador Alberto Vázquez, coa mostra Alberto Vázquez: do cómic á animación, comisariada por Matilde Rodríguez, que se pode ver na Sala de Exposicións de PALEXCO ata o 10 de setembro. Vázquez é un destacado director de animación, ilustrador e debuxante de cómics nado na Coruña, que conta con catro Premios Goya no seu palmarés, polas curtas de animación Birdboy (2012) e Decorado (2017) e polas longametraxes de animación Psiconautas, los niños olvidados (2017) e Unicorn Wars (2023).

Alberto Vázquez: do cómic á animación ofrece unha coidada selección de pezas que desvelan o característico traballo iconoclasta do artista -protagonizado por animais antropomorfos- e as súas temáticas universais de ámbito social. O público poderá explorar o seu singular enfoque creativo a través dos orixinais dos seus cómics PsiconautasEl evangelio de JudasLa caza e algunhas historias curtas; e poderá mergullarse tamén nos seus procesos de animación grazas a layouts, deseños de personaxes, arte conceptual e orixinais dos seus storyboards, realizados a lapis e acuarela, que revelan os detalles que dan vida ás súas personaxes e narrativas.

Ademais, o festival de autoedición e BD da Coruña Autobán da o seu pistoletazo de saída este venres na sala Filomatic, co seu ‘Autobombo’ e o seu ‘Combate de debuxantes’.

Para o público familiar, durante a mañá (de 11.30 a 13.30h) estará dispoñible a Comicteca infantil no Palco da Música do Xardíns de Méndez Núñez, espazo que pola tarde acollerá dous novos obradoiros para nenas e nenos de Viñetas Lab (ás 18.00 e 19.00h).

Na Rúa da BD, aberta de 11.00 a 14.00 e de 17.00 a 21.00h, este venres 11 asinarán as súas obras Ánxel Carramal (Anaya), ás 18.00h; César Sebastián (Metrópolis Cómics A Coruña), ás 18.00h; Inés Vázquez (Demo Editorial), ás 18.30h; María Brenn (Libraría Paz), ás 19.00h; Óscar Losada e Xulia Pisón (Alita Cómics), ás 19.00h;  Santy Gutiérrez (Demo Editorial), ás 19.30h; e, ao longo da xornada, Javier Monja Potente e Frank Peñas Arias (T-Raptor Editorial).

Logo Viñetas desde o Atlántico blanco horizontalConcello da Coruña

© 2024 Viñetas desde o Atlántico.

Aviso legal | Protección de datos | Accesibilidade